नवविवाहित जावयाची व्यथा
#नवविवाहित_जावयाची_व्यथा
काय सांगू तुमका माज्या जीवनाची काणी. लगीन झाला नी सगळी रयाच गेली. लगीन होवचे अगुदर किती सपना रंगवल हुतय.
आवशीबापाशीन माजा थाटामाटात लगीन लावून दिल्यानी. सावतांची शोभा माझी बाईल झाली. पाच तोळ्याचा मगळसुत तेंचे मागनीपरमान घातलव. माका मातर सफारी नी बुटार कटवल्यानी.
लगनाचे माटवात हातीर साखार देऊन पाचपरतावन भागवल्यानी. ता जाऊंदे ओ. लोन काडून बुलाक घेतलय. वनबीएचके वनरशीपचो. बदलापुराक हा. वायच जावचा येवचा लांब पडता पन शोभाक रानीसारी ठेवूची म्हनान घेतलय. बेड घेतलय. स्पंजचो बिछानो घितलय. डास चावतीत म्हनान खिडकींका जाळये लावून घितलय. घरात मस्तपैकी सगळी भांडीकुंडी घितलय. फीरीज,टिवी घितलय. शोभाक कपडे धुवुचो तरास नुको म्हनान वाशिंग मिशिनव घितलय.
आयेक पन बोलवी हुतय पन आये बोलली,शेतीची कामा झाली काय येतय. शोभाक जप. भांडा नुको तिच्यावांगडा. मिया मनात म्हतलय,"मिया काय खुळो आसय भांडाक."
शोभान बुलाकात प्रवेश केल्यान. माका चाय दिल्यान. मियाव तिका बशीभर दिलय. मगे बाजारात जाऊन सरंगो हाडलय. शोभान मस्त तिरफळा घालून सार बनवल्यान. म्हावरा भाजल्यान. दोघावजना येकाच ताटात जेवलव नी मुरी मारुन निजलव.
असे दोन दिस म्हंजी स्वर्गातच आसव असे गेले. मिया नी माजा शोभला. बाकीच्या जगाशी आमचा कायैक देनाघेना नव्हता नी तिसऱ्या दिशी सकाळीच शोभल्याची आव्स नि शोभल्याचो धकलो भाव,माजो मेव्हणो दारार हजर.
मिया स्वागत केलय तेंचा. ताँडभर बोललय. शोभान कांदेफॉव केल्यान. दोपारी मटान रानला. माका वाटला सानचे जातीत. म्हंजी आजून पावनी हय आसत तेंची. माज्या सासयेची भयन खरवलीत रवता. माका वाटला राती थय जातीत निजाक. कसला काय घेऊन बसलास. गेलीच नायत.
बेडवर शोभावांगडा तिची आव्स निजली नी तिचो भाव हालमदी माज्यावांगडा. पायलीचो भात रगडल्यान नी घोरी होतो. कुंभकर्ण खयलो नी झोपेत मेलो मिठी आनी मारता,लाथा मारता. इटंबना निसती.
असलो राग इलो म्हनान सांगू. चार दिस झाले तरी जाव्च नाव काढिनात. शेवटाक मियाच वायच धीर करुन म्हतलय," आत्तेनू,मामांचे जेवनाखावनाचे हाल होयत आसतीत नाय थय."
"तेंका सगळा बनवूक येता. लगीन होवचे अदुगर कायैक येत नव्हता. मिया सगळा शिकवलय तेंका. खळ्यात वाडवन मारतत. घरात केर काढतत. म्हशीचा दूध काढतत. ढोरांका खाना घालतत. रातीची भांडी घासतत,ओटो पुसतत,आमटीभात करतत. सगळा शिकवलय तेंका. म्हनान तर माका कदी व्हया तसा उठून चलत रव्हाक गावता. शोभल्याक सांगलय तुमकाव टिरेन करुक."
असलो राग इलल्लो म्हनान सांगू. सासू हा काय कोन असा वाटला. लग्नाचे अदुगर जावयबापू अशी साद घाली नी आता माका सदू म्हनता. नाव माजा सिद्धेश ता तरी घेवचा तर नाय. तिघावजना बाजारात जातत नी अख्खो बाजार घेवून येतत. बरा पैसे कोनाचे तर माज्या पाकिटातले. त्या मेव्हन्याक माज्या बनयनी,अंडरवेर,बामारडा नी टिशर्टा घेऊन इलिता. जसा काय तडे गावाक काय गावतच नाय. सासयेन चपलाचो जोड,चार काठापदराची लुगडी,रेडीमेड पोलकी घितल्यान. माजा एटीएम कार्ड शोभल्याक दिल्लय मिया. तेचो सासयेन बरो फायदो घितल्यान.
शोभल्याक काय सांगूक गेलय काय शोभला भोकाड पसारता मगे तिची आव्स माका खाऊ काय गिळू नजरेन बघता नी म्हेवणो वांडरासारो दात काढून फिदीफिदी हसता.
सासू माका म्हनता,"तुजा पॉट लय सुटलाहा" नी फाटफटी थंडीत कुडकुडत माका जागिंग करुक पाठवता. तडेसून इल्यार कारल्याचो ज्यूस पिऊक लावतत नी आपुन चाय नी खारीबटर खा खा खातत. भातव देईत नायत जेवताना निसती जवारीची भाकरी नी भाजी देतत.
काय करु माका कायैक कळना नाय. डोळ्याफुडी सगळो अंधार गमता. सासयेन माज्या स्पंजचे बेडची निजान निजान भाकरी बनवल्यान हा. घरात काय खाऊक हाडून ठेवूक नुको. म्हेवणो निसतो बोकनीत रव्हता.
कल आयेचो फोन इल्लो. कसो आसस म्हनान इचारी हुती. तिका सांगलय सुखात आसय गे नी डोळ्यान दुखा काढलय.
सासयेच्या अत्याचाराक कटाळललो येक नवविवाहित जावय.
------गीता गजानन गरुड.
झकास.
उत्तर द्याहटवा