कोंब्याची पार्टी

 गीता गजानन गरुड.

#कोंब्याची_पार्टी

निमार वायच उतरत इला तसा पोरांनी मांगरातलो पत्त्याचो डाव गुंडाळलो नी फाळयेत किरकेट खेळाक गेली.डाव रंगात इलो होतो. येका सायटेन रवगो बिडी ओढीत तांब्यो घेऊन भाकरात जात हुतो. 

तांब्यो खाली ठेऊन रवगो झाळकेपाठी बसाक नी सावतांच्या नितल्यान सिक्सर मारुक येकच गाठ पडली नी तो चेंडू जो हवेत उडावलो तो डायरेक्ट रवग्याच्या तांबयार पडलो नी तांबयो लवांडलो. बिचारो रवगो, तेचो झाड्याचो मुडच गेलो. पन तो येकदम साधोभोळो म्हनजे कुनी येका कानात मारल्यान तर दुसरो कान पुढे करणारो होतो.

तो बिचारो तांबयो घेऊन बाहेर इलो नी चेंडू पोरांका देऊन आपला काम न करता घराक लागलो. इकडे पोरा दाताचे फळये काढून तेच्यार हसाक लागली नी वायच सेकान खेळाक परत सुरवात केली. 

थोडो येळ गेलो असात म्हातारी मोरजकारीन नह्यहारुन शीरडा घेऊन पांदयेतसून येत हुती नी धुरयांच्या शिरीन जी बेट फिरयल्यान, तो चेंडू जाऊन म्हातारीचे कमरेर आदाळलो. म्हातारी थयच वाकली पन म्हातारी ताठ. म्हातारेन पयलो तो चेंडू घेतलो. थयच बसकाण मारली नी शीरडा तोडूसाठी जी कोयती वह्रलेलान तीच्यार माश्याचे तुकडे करतात तसे चेंडूचे खसखसाऊन दोन तुकडे केल्यान नी चेंडू मागूक जी दोन बारकी पोरा इलली तेंच्या हातीत परसादीचे द्रोण देतात तसे दिल्यान. तेंव्हा तीच्या कमरेतली कळ आपसी कमी झाली.

पोरा येकठी गोळा झाली . सचलो म्हनाक लागलो म्हातारेन सगळो मुड घालयल्यान आत्ता घराक जावया.दुसरे दिशी पोरा ढोरांहारी गेलली. थय सावलेक बसान तेंनी येक बेत आखलो, कोंब्याच्या पार्टीचो. शिरी नुकतोच पोस्टात कामाक लागलेलो तो पैसे देऊक तयार झालो.पन व्हाळावयल्यांचो पकलो म्हनाक लागलो. कोंबो खायचो तर चोरुनच. मोरजकारीन म्हातारी दोपारी ओरोसच्या हास्पितलात गेलली.पोरांनी मोर्चो तिच्या घराकडे वळवलो. मोरोजकारनीच्या कुत्र्याचे नी आवाटातल्या येका कुत्रीचे गजाली रंगात इले हुते. पोरा सावशीत पाठलेदाराकडे गेली. घुडातलो कोंबो ढापू करन्यात पकलो लय हुशार हुतो. कोंबो पिशीत घालून पोरा शिरीच्या घराकडे गेली. 

शिरीची आऊस मुंबयला धकल्या लेकाकडे गेलली.पोरांका मोकळा रान मिळाला.थय चुलीर पानी तापत ठेयला मगे ता बादलेत ओतून घेतला .कोंब्याची मान कापून तेका गरम पानयात बुडवल्यानी. मगे दोघातीघांनी मिळून तेची पिसा काढली. नी आगीर तेका हुलपवून घेतलो.पाटलेकडची घाण काढून तेका साफ पानयान धुतलो . तेच्या पोटातली आतडी काढून टाकल्यानी.मगे सोकाटन, कोयतो  नी आडाळो घेऊन नीतल्यान तेची सागोती केली.

 तवसर बाळग्यान कलेजी नी तेठो करटेत घेतलो. तेच्यार मीठ शिवारल्यान नी करटी लाल निखार्यांतनी ठेयली. सगळ्यांनी मिळान वाटूनवाटून भाजलेला काळीज, तेठो नी भाजलेले पाय खाल्यानी. 

शिरीन  खडो मसालो,कांदा खोबरा आला लसनीचा भाजका वाटाप काढल्यान. बाळग्यान टोप चुलीर ठेयलो तेतूर तेल घातला, तेल तापल्यार ताजो मालवनी मसालो घालून मसालो तेलात मिस केलो नी मटनाचे फोडी तेच्यात टाकून चमच्यान ढवळीत रवलो. मगे वायच पानी घालून ती सागोती शिजत ठेयली. 

येकीकडे शिरीन कुकरात गेसवर भात लायलो.पोरांचा फुल कोआँपरेशन चललेला.तेंका खबर मिळाली की मोरोजकारीन रातीक तीच्या भावाकडे रानबांबुळीत रवाची हा.तेना पोरा टेंशन फिरी झाली. गावठी कोंब्याचे फोडी शिजाक वायच येळ लागलो तवसर पोरांनी वायच इकडचे तिकडचे गजाली केले.

शिरीकडे  काजीची फका हुती ती चिरुन, सालपटा काढून गरम पानयात  मस्त धुऊन त्यांनी मटनात टाकली. वायच सेकान फोडी शिजले तसा भुतूर वाटाप नी व्हया तितका पानी, मीठ टाकल्यानी. रस्सो रटमटाक लागलो तसा शिरीच्या घरात घमघमाट सुटलो.मगे त्या सगळ्यांनी येकठे बसान वडाप मारलो.पिसांची घाणबीण गायब केली. नी मटान आंगार इल्यार थयसरच गुटली मारली. दुसरे दिशी मोरजकरीन येऊच्याआधी न्हाऊनधुऊन पोरा तारकर्लीचो समद्र बघुक पसार झाली. 

हडे मोरोजकरनीन कोंबो ढापू झाललो बघितलो नी पयले कुत्र्याच्या पेकाटार नळी फेकून मारली नी  कोंबो खाणार्याच्या सात पिढीयेंचो उद्धार करुक लागली.